புதுதில்லி ரயிலில் பயணச் சீட்டு பெற்ற பின்னர் பணம் செலுத்தும் புதிய வசதி குறிப்பிட்ட இணையதளம் மூலம் ஜன.1 அன்று தொடக்கப்பட்டதாக அமைச்சர் மனோஜ் சின்ஹா தெரிவித்தார். மத்திய ரயில்வே துறையின், இந்திய ரயில்வே உணவு மற்றும் சுற்றுலா கழகம் இ-டிக்கெட் சேவைக்கு, பயணச் சீட்டு பெற்ற பிறகு பணம் செலுத்தும் புதிய திட்டத்தை 01.01.2015 அன்று முன்னோடி திட்டமாக அறிமுகம் செய்துள்ளது. இத்திட்டத்தின் முக்கிய அம்சங்கள்:- இத்திட்டத்தின் கீழ், வாடிக்கையாளர்கள் கீழ்வரும் இணைய தளங்கள் மூலம் பயணச் சீட்டு பெற்ற பிறகு பணம் செலுத்தும் வசதி அல்லது இணைய வழி பணம் செலுத்தும் வசதியை தேர்ந்தெடுக்கலாம். i. www.bookmytrain.com ii. Bookmytrain App on Android platform. iii. Bookmytrain App on Windows platform. iv. Bookmytrain App on BlackBerry platform. v. Bookmytrain App on iOS platform. பயணம் தொடங்குவதற்கு ஐந்து நாட்களுக்கு முன்பு வரை வாடிக்கையாளர்கள் தங்களது பயண சீட்டை பதிவு செய்யலாம். பயணிகளின் வசதிக்காக அறிமுகப்படுத்தப்பட்ட இத்திட்டம் வேகமாக பெருகிவரும் கருத்துகளை வைத்து தொடர்ந்து செயல்பட்டு வருகிறது என்று மத்திய ரயில்வே துறை அமைச்சர் மனோஜ் சின்ஹா மக்களவையில் இன்று தெரிவித்தார்.

புது தில்லி: நிலம் கையகப்படுத்தும் மசோதாவுக்கு எதிர்ப்பு தெரிவித்து நாடாளுமன்றம் முன்பு காங்கிரஸ் கட்சியினர் போராட்டம் நடத்தினர். போலீசாரின் தடுப்புகளை மீறிச் செல்ல முயன்ற போது காங்கிரஸ் தொண்டர்களுக்கும், போலீசாருக்கும் இடையே மோதல் ஏற்பட்டது. தொண்டர்களை விரட்டியடிக்க போலீசார் தண்ணீர் பீய்ச்சி அடித்தனர். லேசான தடியடியும் நடத்தப் பட்டது. நிலம் கையகப்படுத்தும் மசோதாவுக்கு எதிர்ப்பு தெரிவித்து இளைஞர் காங்கிரசார் இன்று தில்லியில் நாடாளுமன்ற முற்றுகைப் போராட்டத்தை அறிவித்திருந்தனர். அதன்படி, இன்று காலை இளைஞர் காங்கிரசார் பேரணியாகப் புறப்பட்டு வந்தனர். பேரணியில் முன்னாள் காங்கிரஸ் அமைச்சர்கள் ஜெய்ராம் ரமேஷ், ஆனந்த்சர்மா, அம்பிகா சோனி, ரேணுகா சௌத்ரி உள்ளிட்டோர் பங்கேற்றனர். அப்போது, ராகுல் காந்தி வீட்டில் உளவுத் தகவல் சேகரித்து, மன்மோகன் சிங்குக்கு நிலக்கரிச் சுரங்க முறைகேடு விவகாரத்தில் சம்மன் அனுப்பப் பட்டது ஆகியவற்றுக்கு கண்டனம் தெரிவித்து கோஷங்கள் எழுப்பப்பட்டன. நாடாளுமன்ற சாலை அருகே வந்ததும் போலீசாரின் தடுப்புகளையும் மீறி தொண்டர்கள் செல்ல முயன்றனர். இதனால், போலீஸாருக்கும் காங்கிரஸ் தொண்டர்களுக்கும் இடையே மோதல் ஏற்பட்டது. போலீசார் தண்ணீரைப் பீய்ச்சி அடித்தனர். தொடர்ந்து லேசான தடியடியும் நடத்தப்பட்டது. எம்பி ராஜ்பாப்பர் தலைமையில் ரந்தீப் சூரஜ்வாலா முன்னிலையில் நூற்றுக்கும் மேற்பட்ட காங்கிரஸ் தொண்டர்கள் இந்தப் பேரணியில் கலந்து கொண்டனர். ரந்தீப் சூரஜ்வாலா பேசும்போது, விவசாயிகளுக்கு எதிராக் பாஜக அரசு செயல்படுகிறது என்பதை இன்று வெளிப்படுத்தி விட்டது என்றும் அதை எதிர்த்து காங்கிரஸ் போராடும் என்றும் கூறினார்.

மத்தியப் பிரதேசத்தில் ஓடும் ரெயிலில் இருந்து தூக்கி வீசப்பட்ட 8 வயது சிறுமி உயிருக்கு ஆபத்தான நிலையில் மருத்துவமனையில் சிகிச்சை பெற்று வருகிறார். மத்தியப் பிரதேச மாநிலம் ரத்லாம் – மாண்ட்சோர் மாவட்ட எல்லையில், ரத்லாம்- ஆக்ரா போர்ட் ரயில் சென்றுகொண்டிருந்தது. அப்போது 8 வயதுச் சிறுமி ஒருவர் பொதுப் பெட்டியில் இருந்து திடீரெனத் தூக்கி வீசப்பட்டார். ரயிலில் இருக்கையில் அமர்வதில் ஏற்பட்ட தகராறில் இந்தச் சம்பவம் நிகழ்ந்துள்ளது. அந்தச் சிறுமியின் தந்தை கான்வர்லால், ரத்லாமில் இருந்து நிம்பாகெராவுக்கு அந்த ரயிலில் சென்றுள்ளார். அப்போது, இருக்கையில் அமர்வதற்காக ஏற்பட்ட தகராறில் முகமத் தஸ்லிம் (45) என்பவர் சிறுமியை ஓடும் ரயிலில் இருந்து தூக்கி வெளியே வீசியுள்ளார். அந்தச் சிறுமியின் தந்தை கன்வர்லால் சிறுநீர் கழிக்க கழிவறைக்கு எழுந்து சென்ற நேரத்தில், அந்தச் சிறுமியை முகமது தஸ்லிம் அவ்வாறு ரயிலில் இருந்து தூக்கி வீசியுள்ளாராம். கீழே விழுந்த சிறுமிக்கு தலையில் பலத்த காயம் ஏற்பட்டது. தண்டவாளத்தின் அருகே விழுந்த அந்தச் சிறுமியை போலீசார் பார்த்துள்ளனர். உடனடியாக அவர் மருத்துவமனைக்குக் கொண்டு செல்லப்பட்டார். அவருக்கு தொடர்ந்து சிகிச்சை அளிக்கப்பட்டு அருகிறது. உயிருக்கு ஆபத்தான நிலையில் சிகிச்சை பெற்று வருவதாக போலீஸார் தெரிவித்துள்ளனர். இதனிடையே ரயில்வே போலீசார், முகமது தஸ்லிம்மை கைது செய்து விசாரணை நடத்தி வருகின்றனர். அவர் மீது கொலை முயற்சி வழக்கு பதிவு செய்யப்பட்டுள்ளது. சிறுமி தூக்கி வீசப்பட்டது தொடர்பாக போலீஸார் தகவல் அறிந்ததும், அந்த ரயில், அடுத்த ரயில் நிலையத்தில் நிறுத்தப்பட்டது. முகமது தஸ்லிம் அங்கே கைது செய்யப்பட்டார் என்று போலீஸார் தெரிவித்துள்ளனர்.

புது தில்லி: அரசின் நல திட்டங்களின் பலனைப் பெறுவதற்கு ஆதார் அட்டை எண் கட்டாயமில்லை என உச்ச நீதிமன்றம் மீண்டும் தனது நிலையை அழுத்தமாகத் தெரிவித்துள்ளது. ஆதார் அட்டை குறித்து கட்டாயப்படுத்த கூடாது என்று மத்திய மாநில அரசுகளுக்கு உச்ச நீதிமன்றம் உத்தரவு பிறப்பித்துள்ளது. மேலும், இந்த விவகாரத்தில் கடந்த 2013ம் ஆண்டின் உத்தரவை பின்பற்றுமாறும் அது மத்திய அரசை அறிவுறுத்தியுள்ளது. மத்திய அரசு கேட்டுக்கொண்டும் 2013 அக்டோபரில் ஆதார் எண்ணை அரசுத் திட்டங்களைப் பெற கட்டாயமாக்க வேண்டும் என்ற அரசின் வேண்டுகோளை தள்ளுபடி செய்தது தனி நீதிமன்றம்.