பெங்களூர்:

கர்நாடக ஊடகங்களில் வெளியாகி வரும் சசிகலா சிறைவாசம் குறித்த வீடியோக்களால் மாநில அரசியல் கலகலத்துப் போய்க் கிடக்கிறது. இந்த உண்மைகள் வெளிச்சத்துக்கு வரக் காரணமான ரூபா, சிறைத்துறையில் இருந்து போக்குவரத்துத் துறைக்கு பணியிட மாற்றம் செய்யப்பட்டுள்ளார். பதிலடியாக, சசிகலாவும் பரப்பன அக்ரஹார சிறையில் இருந்து தும்கூர் சிறைக்கு மாற்றப்படலாம் என்று தகவல்கள் தெரிவிக்கின்றன.

கர்நாடக சிறைத்துறை டிஐஜி ரூபாவிடம் அக்ராஹார சிறையில் நடந்த விதிமீறல்கள் குறித்த சில முக்கிய வீடியோ ஆதாரங்கள் இருப்பதாகவும், விரைவில் அவற்றை அவர் வெளியிடுவார் என்றும் ஊடக வட்டாரத்தில் கூறப்படுகிறது.

முன்னதாக, பெங்களூர் சிறையில் அடைபட்டிருக்கும் சசிகலாவுக்கு தனி சமையலைறை உட்பட பல வசதிகளை சிறையில் செய்து கொடுத்திருப்பதாகவும், இதற்காக சிறை அதிகாரிகள் சிலருக்கு ரூ.2 கோடி பணம் கைமாறப்பட்டதாகவும் சிறைத்துறை டிஐஜி ரூபா பரபரப்பு புகார் அளித்தார்.

இதுகுறித்து விசாரிக்க ஒரு விசாரணைக்குழு அமைக்கப்பட்டது. அந்தக் குழு விசாரணையே தொடங்காத நிலையில், சிறையில் நடந்த விதிமிறல்கள் குறித்த ஆதாரங்கள் அழிக்கப்பட்டுவிட்டதாக ரூபா மீண்டும் புகார் கூறினார். இதனிடையே அவர் போக்குவரத்துப் பிரிவுக்கு பணி மாற்றம் செய்யப்பட்ட நிலையில், சிறையில் நிகழ்ந்த முறைகேடுகள் வீடியோக்களாக கர்நாடக ஊடகங்களில் வலம் வருகின்றன. வீடியோ ஆதாரங்கள் அழிக்கப் பட்டு விட்டதாக ரூபா கூறிய நிலையில், இத்தகைய வீடியோக்கள் வலம் வருவது கவனிக்கத் தக்கது. இருப்பினும், அவர் தன்னிடம் உள்ள சில முக்கிய வீடியோ மற்றும் புகைப்பட ஆதாரங்களை பத்திரிக்கையாளர்கள் மூலம் வெளியிடக் கூடும் என்று கூறப் படுகிறது. எனவே, டிஐஜி ரூபாவிடம் இருந்து எந்த நேரத்திலும் பரபரப்பான தகவல்கள் வெளியாகலாம் என எதிர்பார்க்கப்படுகிறது.

இதனிடையே பெங்களூரு பரப்பன அக்ரஹாரா சிறையில் இருக்கும் சசிகலா, சிறை விதிமுறையை மீறியதாக எழுந்துள்ள புகாரை தொடர்ந்து தும்கூர் பெண்கள் சிறைக்கு மாற்ற கர்நாடக உள்துறை முடிவு செய்துள்ளதாக தகவல்கள் கசிந்துள்ளன.

பெங்களூரு பரப்பன அக்ரஹாரா சிறையில் சசிகலா சகல வசதிகளுடன் இருக்கும் வீடியோ தற்போது இணையதளத்தில் வைரலாக பரவி வருகிறது. இந்நிலையில் சசிகலாவை வேறு சிறைக்கு மாற்ற கர்நாடக உள்துறை முடிவு செய்துள்ளதாம். கர்நாடக மாவட்டம் தும்கூர் சிறைக்கு சசிகலாவை மாற்ற திட்டமிட்டுள்ளனர். இதற்காக உச்ச நீதிமன்றத்தில் மனு தாக்கல் செய்து உத்தரவு பெற கர்நாடக அரசு முடிவு செய்துள்ளது. ஆனால் உடனடியாக அவ்வாறு மாற்ற முடியாது என்றும், 15 நாள் முதல் 1 மாதம் வரை ஆகும் என்றும் கூறப்படுகிறது. இந்நிலையில், சசிகலாவுக்கு அளிக்கப்பட்ட சலுகைகள் மற்றும் சிறைத்துறை விதி மீறல் குறித்து ஓய்வு பெற்ற ஐ.ஏ.எஸ் அதிகாரி வினய்குமார் தலைமையில் இன்று சிறை கைதிகளிடம் விசாரணை நடத்தப் பட்டது.

பெங்களூரு பரப்பன அக்ரஹாரா சிறையில் சசிகலாவுக்கு 5 அறைகள் ஒதுக்கீடு செய்யப்பட்டு, அதனை அவர் பயன்படுத்தினார் என தகவல் வெளியாகி பரபரப்பை ஏற்படுத்தியுள்ளது.

சொத்துக் குவிப்பு வழக்கில் அ.தி.மு.க. (அம்மா) அணியின் பொதுச் செயலாளர் சசிகலா, இளவரசி, சுதாகரன் ஆகியோருக்கு தலா 4 ஆண்டுகள் சிறை தண்டனை விதிக்கப்பட்டு பெங்களூரு பரப்பன அக்ரஹாரா சிறையில் அடைக்கப்பட்டுள்ளனர். சிறைவாசம் அனுபவித்து வரும் சசிகலாவுக்கு சிறப்பு வசதிகள் செய்து கொடுக்கப்பட்டுள்ளதாக அவ்வப்போது தகவல்கள் வெளியாகி வந்தாலும், அவருக்கு சிறையில் எந்தவொரு சிறப்பு சலுகையும் வழங்கப்படவில்லை என்றும், சாதாரண கைதி போலவே அவர் நடத்தப்படுகிறார் என்றும் சிறைத்துறை அதிகாரிகள் கூறி வந்தனர்.

இந்நிலையில், பரப்பன அக்ரஹாரா சிறையில் கடந்த 10ஆம் தேதி டிஐஜி.,யாக இருந்த ரூபா ஆய்வு செய்து, அங்கு சசிகலாவுக்கு சிறப்பு வசதிகள் செய்து கொடுக்கப்பட்டிருப்பதாகக் கூறினார். இதுதொடர்பாக கடந்த 12ஆம் தேதி சிறைத்துறை டிஜிபி.,யாக இருந்த சத்தியநாராயண ராவிடம் அவர் அறிக்கையும் தாக்கல் செய்தார். அந்த அறிக்கையில் சசிகலாவுக்கு தனி சமையல் அறை உள்பட சிறப்பு வசதிகள் செய்து கொடுக்கப்பட்டுள்ளதாகவும், இதற்காக ரூ.2 கோடி லஞ்சம் வாங்கப்பட்டுள்ளதாகவும் குற்றம் சாட்டி இருந்தார். இதனை சத்தியநாராயண ராவ் மறுத்து வந்தார்.

இந்நிலையில் சசிகலாவை சந்திக்க வருபவர்களுடன், அவர் பேசுவதற்காக தனி அறை ஒதுக்கப்பட்டு அங்கு நாற்காலிகள் உள்ளிட்ட வசதிகள் செய்து கொடுக்கப்பட்டிருந்ததாக தகவல் வெளியானது. மேலும் பரப்பன அக்ரஹாரா சிறையில் சசிகலாவுக்கு 5 அறைகள் ஒதுக்கப்பட்டிருப்பதாக தகவல்கள் வெளியாகியுள்ளன.

சசிகலா தூங்குவதற்கு வசதியாக ஒரு அறையும் (பெட்ரூம்), தனி சமையல் அறையும், அவர் பயன்படுத்தும் பொருட்கள் வைக்க ஓர் அறையும், அவரை சந்திக்க சிறைக்கு வருபவர்களுடன் பேசுவதற்காக பார்வையாளர் அறையும், யோகா உள்ளிட்ட உடற்பயிற்சி செய்ய மற்றொரு அறையும் என மொத்தம் 5 அறைகள் இருப்பதாக தகவல் வெளியாகியுள்ளது. அந்த அறைகள் பற்றி வெளியே தெரியாதபடி முன்பக்க கதவுகளில் துணி போட்டு மூடப்பட்டுள்ளன. சசிகலா தங்கி இருக்கும் சிறை அறைக்கு மற்ற பெண் கைதிகள் செல்ல முடியாத அளவுக்கு பாதுகாப்பாக, இரும்புக் கதவு உள்ளது.

ரூ.2 கோடி லஞ்சம் பெற்றுக் கொண்டு சசிகலாவுக்கு சிறப்பு வசதிகள் செய்து கொடுக்கப்பட்டுள்ளதாக அதிகாரி ரூபா கூறிய குற்றச்சாட்டுகளை நிரூபிக்கும் வகையில், சசிகலாவுக்கு 5 அறைகள் ஒதுக்கப்பட்டு இருப்பது தொடர்பான வீடியோ காட்சிகள் நேற்று ‘டைம்ஸ் நவ்’ மற்றும் சில கன்னட தொலைக்காட்சி சேனல்களிலும் சமூக வலைத்தளங்களிலும் வெளியானது.

சிறையில் ஆய்வு செய்தபோது தான் எடுத்திருந்த வீடியோ காட்சிகள் அழிக்கப்பட்டிருப்பதாக ரூபா தனது 2 ஆவது அறிக்கையில் குறிப்பிட்டிருந்த நிலையில், தற்போது அந்த வீடியோ காட்சிகள் வெளியாகி பெரும் பரபரப்பை ஏற்படுத்தி உள்ளது. ஆனால் வசதிகள் செய்து கொடுக்கப்பட்டிருப்பதாகக் கூறி வெளியான வீடியோ காட்சிகள் சசிகலா அறைதானா என்பதை கர்நாடக சிறை அதிகாரிகள் உறுதிப்படுத்தவில்லை.

புது தில்லி:

குடியரசுத் துணைத் தலைவர் தேர்தலில் பாஜகவின் சார்பில் வேட்பாளராக வெங்கய்ய நாயுடு அறிவிக்கப் பட்டிருக்கிறார். அவர் பெயரை கட்சியின் தலைவர் அமித் ஷா அறிவித்தார்.

குடியரசுத் துணைத் தலைவர் தேர்தலில் யார் போட்டியிடுவது என்று பலத்த விவாதம் கட்சிக்குள் எழுந்தது. இருப்பினும், பலரின் தேர்வாக வெங்கய்ய நாயுடுவின் பெயரே இருந்தது.

அவர், நாடாளுமன்றத்தில் திறம்படச் செயலாற்றி வருபவர். பழுத்த அனுபவம் கொண்டவர். குடியரசுத் துணைத் தலைவர்தான், மாநிலங்களவைக்கும் தலைவராக இருந்து வழிநடத்துபவர் என்பதால், இதற்கு நாடாளுமன்ற அனுபவமும் தேவைப்படுகிறது. எனவே வெங்கய்ய நாயுடு பொருத்தமாக இருப்பார் என்று கருதப் பட்டது.

இத்தகைய பின்னணியில் இன்று கட்சியின் தலைவர் அமித் ஷா தலைமையில் கட்சியின் நாடாளுமன்றக் குழு கூடி, வெங்கய்ய நாயுடு பெயரை தேர்வு செய்தது. மேலும் சிலர் பெயர் அடிபட்டாலும், இறுதியில் இவர் தேர்வாகியிருக்கிறார். இதன் மூலம் தென்னிந்தியாவைச் சேர்ந்த ஒருவருக்கு இந்த வாய்ப்பு கிடைத்துள்ளது.

இது குறித்து கருத்து தெரிவித்த அமித் ஷா, வெங்கய்ய நாயுடு நாளை மனுத் தாக்கல் செய்வார் என்று கூறினார்.