• முனைவர் கு.வை. பாலசுப்பிரமணியன்

பதினேழாம் நாள்

ஐபிஎல் 2024 – 07.04.2024

இரண்டு ஆட்டங்கள்

இன்று இரண்டு ஆட்டங்கள் நடைபெற்றன. முதல் ஆட்டம் மும்பையில் மும்பை இந்தியன்ஸ் அணிக்கும் டெல்லி கேபிடல்ஸ் அணிக்கும் இடையே பகலிரவு ஆட்டமாக நடைபெற்றாது. இரண்டாவது ஆட்டம் லக்னோவில் லக்னோ சூப்பர் ஜெயண்ட்ஸ் அணிக்கும் குஜராத் டைட்டன்ஸ் அணிக்கு இடையே நடைபெற்றது. 

மும்பை vs டெல்லி

மும்பை அணி (234/5, ரோஹித் ஷர்மா 49, இஷான் கிஷன் 42, ஹார்திக பாண்ட்யா 39, டிம் டேவிட் 45, ரொமாரியோ ஷெப்பேர்ட் 39, அக்சர் படேல் 2/35, நார்ட்ஜே 2/65) டெல்லி அணியை (205/8, ட்ரிஸ்டன் ஸ்டப்ஸ் 71*, பிருத்வி ஷா 66, அபிஷேக் போரல் 41, ஜெரால்ட் கொயட்சி 4/34, பும்ரா 2/22) 29 ரன்கள் வித்தியாசத்தில் வென்றது.

பூவாதலையா வென்ற டெல்லி அணி முதலில் பந்து வீசத் தீர்மானித்தது. மும்பை அணியின் தொடக்க வீரர்கள் ரோஹித் ஷர்மா மற்றும் இஷான் கிஷன் இருவரும் நன்றாக ஆடினார்கள். ரோஹித் 27 பந்துகளில் 49 ரன் (6 ஃபோர்கள் மற்றும் 3 சிக்சர்கள்) அடித்தார். இஷான் கிஷன் 23 பந்துகளில் 42 ரன் (4 ஃபோர், 2 சிக்சர்) அடித்தார். இன்று ஐ.பி.எல் 2024 இல் முதன் முறையாக ஆட வந்த சூர்யகுமார் யாதவ் ரன் எதுவும் எடுக்காமல் ஆட்டமிழந்தார். திலக் வர்மா 5 ரன் களில் அவுட்டானார். ஹார்திக் பாண்ட்யா (33 பந்துகளில் 39 ரன்), டிம் டேவிட் (21 பந்துகளில் 45 ரன்) இருவரும் மும்பை அணியின் ரன் ரேட் குறையா வண்ணம் பார்த்துக்கொண்டனர். இன்றைய ஹைலைட் மும்பை அணியின் ரொமாரியோ ஷெப்பேர்ட்-தான். கடைசி ஓவரில் 4 சிக்சர் மற்றும் 2 ஃபோர் அடித்து 202 என்று இருந்த மும்பை அணியின் ஸ்கோரை அவர் 234 ரன்னுக்கு உயர்த்தினார்.    

235 ரன் என்ற கடினமான இலக்கை அடைய இரண்டாவதாக ஆட வந்த டெல்லி அணியின் முதல் நான்கு வீரர்கள் சிறப்பாக ஆடினர். டேவிட் வார்னர் (8 பந்துகளில் 10 ரன்) 3.4 ஓவரில் ஆட்டமிழந்தார். அதன் பின்னர் மற்றொரு தொடக்க வீரரான பிருத்வி ஷா நீண்ட நாட்களுக்குப் பின்னர் இன்று அதிரடியாக ஆடினார். அவர் 40 பந்துகளில் 66 ரன் அடித்து 12ஆவது ஓவரில் ஆட்டமிழந்தார். அவருடன் இணைந்து அபிஷேக் போரல் (31 பந்துகளில் 41 ரன்) மற்றும் ட்ரிஸ்டன் ஸ்டப்ஸ் (25 பந்தில் ஆட்டமிழக்கமல் 71 ரன், 3 ஃபோர், 7 சிக்சர்) இருவரும் சிறப்பாக ஆடினர். ஆனால் பிற டெல்லி அணி வீரர்கள் நிலைத்து ஆடாததால் டெல்லி அணி 20 ஓவர் முடிவில் 8 விக்கட் இழப்பிற்கு 205 ரன் மட்டுமே எடுத்தது. கடைசி ஓவரில் 6 பந்துகளில் 34 ரன் எடுக்க வேண்டியிருந்தது. ஆனால் அந்த ஓவரில் லலித் யாதவ், குமார் குஷகர, ரிச்சர்ட்சன் ஆகியோர் கோயட்சி பந்துவீச்சில் ஆட்டமிழந்தனர். எனவே டெல்லி அணி 29 ரன் கள் வித்தியாசத்தில் தோல்வி அடைந்தது.

மும்பை அணியின் ரொமாரியோ ஷெப்பேர்ட் தன்னுடைய சிறப்பான பேட்டிங்கிற்காக ஆட்டநாயகனாக அறிவிக்கப்பட்டார். 

லக்னோ vs குஜராத்

லக்னோ அணி (163/5, மார்கஸ் ஸ்டோயினிஸ் 58, கே.எல். ராகுல் 33, நிக்கோலஸ் பூரன் 32, ஆயுஷ் பதோனி 20, உமேஷ் யாதவ் 2/22, தர்ஷன் நல்கண்டே 2/21) குஜராத் அணியை (18.5 ஓவரில் 130, ராகுல் திவாத்தியா 30, சாய் சுதர்ஷன் 31, யஷ் தாகூர் 5/30, க்ருணால் பாண்ட்யா 3/110) 33 ரன்கள் வித்தியாசத்தில் வென்றது. 

பூவா தலையா வென்ற லக்னோ அணி முதலில் மட்டையாட முடிவுசெய்தது. இன்று இந்த அணியின் வீரர்கள் தடாலடி பேட்டிங் எதுவும் செய்யவில்லை. சீரான ரன்ரேட்டுடன் பேட்டிங் செய்தனர். ராகுல் (33 ரன்), ஸ்டோயினிஸ் (58 ரன்), நிக்கோலஸ் பூரன் (32 ரன்), பதோனி (20 ரன்) ஆகிய நால்வரும் சிறப்பாக விளையாடினர். டி காக் (6 ரன்), படிக்கல் (7 ரன்) இருவரும் இன்று சரியாக விளையாடவில்லை. 20 ஓவர் முடிவில் லக்னோ அணி 5 விக்கட் இழப்பிற்கு 163 ரன் எடுத்திருந்தது. 

164 என்ற இலக்குடன் இரண்டாவதாக ஆடவந்த குஜராத் அணியின் தொடக்க வீரர்கள் சாய் சுதர்ஷன் மற்றும் கில் சுமாரான தொடக்கம் தந்தார்கள். அதன் பின்னர் டாகுதிவாத்தியா (30 ரன்) தவிர பிற குஜராத் அணி வீரர்கள் ஆட்டத்தை வெல்வதற்கான ந்ம்பிக்கையின்றி ஆடினர் இதனால் 18.5 ஓவரில் 130 ரன்னுக்கு அந்த அணி அனைத்து விக்கட்டுகளையும் இழந்து தோல்வியைச் சந்தித்தது. லக்னோ அணியின் யஷ் தாகூர் 30 ரன் கொடுத்து 5 விக்கட் வீழ்த்தினார். க்ருணால் பாண்ட்யா 11 ரன் கொடுத்து 3 விக்கட் வீழ்த்தினார்.  

லக்னோ அணியின் யஷ் தாகூர் தன்னுடைய சிறப்பான பந்துவீச்சிற்காக ஆட்டநாயகனாக அறிவிக்கப்பட்டார். நாளை சென்னையில் சென்னை சூப்பர் கிங்க்ஸ் அணிக்கும் கொல்கொத்தா நைட் ரைடர்ஸ் அணிக்கும் இடையே ஆட்டம் நடைபெறும்.   

• முனைவர் கு.வை. பாலசுப்பிரமணியன்

பதினாறாம் நாள்
ஐபிஎல் 2024 – 06.04.2024 – ஜெய்ப்பூர் 
ராஜஸ்தான் ராயல்ஸ் vs ராயல் சேலஞ்சர்ஸ் பெங்களூரு

பெங்களூரு அணியை (183/3, விராட் கோலி 113*, ட்யு பிளேசிஸ் 44, சாஹால் 2/34) ராஜஸ்தான் அணி (19.1 ஓவரில் 189/4, ஜாஸ் பட்லர் 100*, சஞ்சுசாம்சன் 69) 6 விக்கட்டுகள் வித்தியாசத்தில் வென்றது.

இன்று ஜெய்ப்பூரில் ராஜஸ்தான் ராயல்ஸ் அணிக்கும் ராயல் சேலஞ்சர்ஸ் பெங்களூரு அணிக்கும் இடையே ஆட்டம் நடைபெற்றது. பூவாதலையா வென்ற ராஜஸ்தான் அணி முதலில் பந்து வீசத் தீர்மானித்தது. பெங்களூரு அணியின் தொடக்க வீரர்கள் விராட் கோலி மற்றும் ட்யு பிளேசிஸ் இருவரும் நன்றாக ஆடினார்கள். கோலி 72 பந்துகளில் 113 ரன் அடித்து ஆட்டமிழக்காமல் இருந்தார். இதில் 12 ஃபோர்கள் மற்றும் 4 சிக்சர்கள் அடங்கும். ட்யு பிளேசிஸ் 44 ரன் எடுத்தார். கிளன் மேக்ஸ்வெல் மற்றும் சௌரவ் சௌஹான் இருவரும் சோபிக்கவில்லை. 20 ஓவர் முடிவில் பெங்களூரு அணி மூன்று விக்கட் இழப்பிற்கு 183 ரன் எடுத்திருந்தது.   

184 ரன் என்ற இலக்கை அடைய இரண்டாவதாக ஆட வந்த ராஜஸ்தான் அணியின் தொடக்க வீரர் யஸஸ்வி ஜெய்ஸ்வால் இன்றும் இரண்டாவது பந்தில் ஆட்டமிழந்தார். டெஸ்ட் போட்டிகளில் அதிரடியாக ஆடிய இவர் டி20 ஆட்டத்தில் சொதப்புவது ஆச்சரியமாக இருக்கிறது. ஆனால் மற்றொரு தொடக்க வீரரான ஜாஸ் பட்லர் (58 பந்துகளில் ஆட்டமிழக்காமல் 100 ரன், 9 ஃபோர், 4 சிக்சர்) சஞ்சு சாம்சனுடன் (42 பந்துகளில் 69 ரன், 8 ஃபோர், 2 சிக்சர்) இணைந்து 14.4 ஓவர் வரை ஆடி 148 ரன் எடுத்து வெற்றியை உறுதி செய்தனர். ரியன் பராக் மற்றும் துருவ் ஜுரல் இருவரும் சொற்ப ரன்னுக்கு ஆட்டமிழந்தபோதிலும் ராஜஸ்தான் அணி 19.1 ஓவரில் 4 விக்கட் இழப்பிற்கு 189 ரன் எடுத்து வெற்றியைப் பெற்றது. 

இரண்டு அணியிலும் தலா ஒரு பேட்டர் சதம் அடித்தது இந்த ஆட்டத்தின் சிறப்பு. விராட் கோலி சற்று அதிரடியாக ஆடியிருந்தால் ஒருவேளை முடிவு மஆறியிருக்கலாம்.  ராஜஸ்தான் அணியின் ஜாஸ் பட்லர் தன்னுடைய சிறப்பான பேட்டிங்கிற்காக ஆட்டநாயகனாக அறிவிக்கப்பட்டார். நாளை இரண்டு ஆட்டங்கள் நடைபெற உள்ளன. முதல் ஆட்டம் மும்பையில் மும்பை இந்தியன்ஸ் அணிக்கும் டெல்லி கேபிடல்ஸ் அணிக்கும் இடையே பகலிரவு ஆட்டமாக நடைபெறும். இரண்டாவது ஆட்டம் லக்னோவில் லக்னோ சூப்பர் ஜெயண்ட்ஸ் அணிக்கும் குஜராத் டைட்டன்ஸ் அணிக்கு இடையே நடைபேறும்.  

பதினைந்தாம் நாள்
ஐபிஎல் 2024 – 05.04.2024 – ஹைதராபாத்
சென்னை சூப்பர் கிங்ஸ் vs சன்ரைசர்ஸ் ஹைதராபாத்

• முனைவர் கு.வை. பாலசுப்பிரமணியன்

சென்னை அணியை (166/5, ஷிவம் துபே 45, அஜிங்க்யா ரஹானே 35, ரவீந்த்ர ஜதேஜா 31*) ஹதராபாத் அணி (18.1 ஓவரில் 166/4, எய்டன் மர்க்ரம் 50, அபிஷேக் ஷர்மா 37, ட்ராவிஸ் ஹெட் 31) 6 விக்கட்டுகள் வித்தியாசத்தில் வென்றது.

இன்று ஹைதராபாத்தில் சன்ரைசர்ஸ் அணிக்கும் சென்னை சூப்பர் கிங்ஸ் அணிக்கும் இடையே ஆட்டம் நடைபெற்றது. பூவாதலையா வென்ற ஹைதராபாத் அணி முதலில் பந்துவீசத் தீர்மானித்தது.

சென்னை அணியின் தொடக்க வீரர்கள் ரச்சின் ரவீந்த்ரா (12 ரன்) மற்றும் ருதுராஜ் கெய்க்வாட் (26 ரன்) 8 ஓவருக்குள்ளே ஆட்டமிழந்தனர். அதன் பின்னர் அஜிங்க்யா ரஹானே (35 ரன்), ஷிவம் துபே (24 பந்துகளில் 45 ரன்), ஜதேஜா (31 ரன்) ஆகியோர் சிறப்பாக வீளையாடியும் அதிரடியாக ரன் சேர்க்க முடியவில்லை.

சன்ரைசர்ஸ் அணியின் அனைத்து பந்துவீச்சாளர்களும் நன்றாக பந்துவீசினர். சென்னை அணி 20 ஓவர் முடிவில் 5 விக்கட் இழப்பிற்கு 165 ரன் எடுத்தது.

166 ரன் என்ற இலக்கை அடைய இரண்டாவதாக ஆட வந்த சன்ரைசர்ஸ் அணியின் தொடக்க வீரர் அபிஷேக் ஷர்மா அதிரடி ஆட்டம் ஆடினார். அவர் 12 பந்துகளில் 37 ரன் எடுத்து ஆட்டமிழந்தார். ட்ராவிஸ் ஹெட் (24 பந்துகளில் 31 ரன்), மர்க்ரம் (36 பந்துகளில் 50 ரன்) என அனைவரும் நன்றாக ஆடினர். இதனால் சன்ரைசர்ஸ் அணியின் ஸ்கோர் ரேட் சென்னை அணியின் ரன் ரேட்டைவிட எப்பொதும் அதிகமாகவே இருந்தது.

எனவே எந்தவிதப் பதற்றமும் இன்றி 18.1 ஓவர்களில் 4 விக்கட் இழப்பிற்கு 166 ரன் எடுத்து சன்ரைசர்ஸ் அணி வெற்றி பெற்றது. சன்ரைசர்ஸ் அணியின் கிளாசனும் சிக்ஸ் அடிக்கவில்லை; சென்னை அணியின் தோனியும் சிக்ஸ் அடிக்கவில்லை.

சன்ரைசர்ஸ் அணியின் அபிஷேக் ஷர்மா தன்னுடைய சிறப்பான பேட்டிங்கிற்காக ஆட்டநாயகனாக அறிவிக்கப்பட்டார். நாளை ஜெய்ப்பூரில் ராஜஸ்தான் ராயல்ஸ் அணிக்கும் ராயல் சேலஞ்சர்ஸ் பெங்களூரு அணிக்கும் இடையே ஆட்டம் நடைபெறும்.